لە پێناو دیالۆگی شارستانیەتەکان …. شاندی "سەنتەری لێکۆڵینەوەی دەستپێشخەری شارستانیەتی جیهانی" سەردانی گەورەترین ناوەندی توێژینەوەی چینی کرد

لە چوارچێوەی چالاکییەکانی سێیەم ڕۆژی سەردانە زانستییەکەیاندا بۆ وڵاتی چین، شاندی سەنتەری لێکۆڵینەوەی دەستپێشخەری شارستانیەتی جیهانی سەردانی) پەیمانگای لێکۆڵینەوەی ڕۆژئاوای ئاسیا و ئەفریقا (یان کرد، کە سەر بە ئەکادیمیای زانستە کۆمەڵایەتییەکانی چینە (CASS).

ئەم دیدارە بە یەکێک لە گرنگترین وێستگەکانی گەشتەکە دادەنرێت، بەوپێیەی ئەم پەیمانگایە ناوەندێکی بڕیارەبەدەست و ستراتیژییە بۆ لێکۆڵینەوە لە کاروباری ناوچەکە.

لە کۆبوونەوەیەکی هاوبەشدا کە بە بەشداری پسپۆڕانی باڵای پەیمانگاکە و نوێنەرانی پەیمانگای چین بۆ لێکۆڵینەوە نێودەوڵەتییەکان (CIIS) و فەرمانگەی نێودەوڵەتی لە پارتی کۆمۆنیستی چین (IDCPC) بەڕێوەچوو، گفتوگۆی چڕ دەربارەی چۆنیەتی جێبەجێکردنی "دەستپێشخەری شارستانیەتی جیهانی" کرا. باس لەوە کرا کە ناوچەی ڕۆژئاوای ئاسیا و ئەفریقا دەبنە جێگەی بایەخی سەرەکی لە توێژینەوە ستراتیژییەکانی داهاتوودا. هەروەها تیشک خرایە سەر گرنگی "فیکری دیپلۆماسیی نوێی چین" و چۆنیەتی ڕەنگدانەوەی لە پەیوەندییە نێودەوڵەتییەکاندا. لایەنی چینی خۆشحاڵی خۆیان دەربڕی بۆ بوونی سەنتەرێکی تایبەت بەم بوارە و وەک هەنگاوێکی گرنگ بۆ نزیککردنەوەی دیدگای هەردوولا لە قەڵەمیان دا.

ئەم سەردانە ڕێگەی خۆشکرد بۆ لێکتێگەیشتنی زانستی لە نێوان هەردوو لادا، بە ئامانجی ئەنجامدانی کۆنفرانسی هاوبەش و ئاڵوگۆڕی توێژەر. لە کۆتایی "سەنتەری لێکۆڵینەوەی دەستپێشخەری شارستانیەتی جیهانی" لە ڕێگەی ئەم جۆرە دیدارە ئاستبەرزانەوە، دەیەوێت ببێتە ناوەندێکی پێشەنگ لە ناوچەکەدا بۆ شیکردنەوەی ستراتیژییەتە جیهانییەکان و بەهێزکردنی دیپلۆماسیی فیکری.